Schbort is xund! Åwer nur, wenn mer den Schbort aa selwer mächt! Bloß zuguggen, wenn annere ihrn Schbort mache, reicht nit! Un wenn mer bein Fernsehguggen zehnmal zunn Glo läff muss, dann is des aa noch kee Schbort! Selbst wenn mer di Schbortschau guggt! Ä bissle mehr Bewechung müsst schon sei!

Åwer es gibt ja viel Schbort-Arten. Zunn Beispiel Roggn Roll mitn Rollador. Weitradeln mitn neue E-Beik. Schobbn-Wandern bis zunn Schobbn-Express. 30 Minuden Nåchbårschafts-Gschbräch mit Händ un Füüß, - un noch lauder so Zeuch mehr! Hauptsach mer is aktiv, wie di Kranggnkass sächt!

Höchberch is ja bekannt für sei höche Berch! Desderweeche müsse di Krackn - also so heißn di Höchbercher in Höchberch - in ihrn Ort immer di Berch nauf un nunder läff. Un des is guud fürn Herz, såcht der Dogder! Un desderweeche håmm di Höchbercher immer alsemål so ä schönne Gsichtsfarb!

Mei bersönlicher Dibb: Gleich vormiddaachs eweng Beweechung un xunde Ernährung, dann kånn mer åbends aa enn Schobbe gedrink!

Also: Xundheit is des höchste Gut. Überall. Aa in Höchberch! Un Meefrangn is subber!

Dr. Gunther Schunk Fünffacher Asterix-Übersetzer uff Meefränggisch